Dharbandora Car Accident: धारबांदोडयात थरार! मृत म्हशीला चुकवण्याच्या नादात कार थेट दरीत

धारबांदोडा: धारबांदोडा येथे रविवारी (१३ जूलै) सकाळच्या सुमारास एक धक्कादायक अपघात घडला. मृत म्हशीला चुकवण्याच्या प्रयत्नात एका कारचा ताबा सुटून ती थेट दरीत कोसळली. या अपघातात कारचा चालक जखमी झाला असून त्याच्यावर उपचार सुरू आहेत.

पोलिसांनी दिलेल्या माहितीनुसार, अपघातग्रस्त कार ही कर्नाटक राज्यातून गोव्यात आली होती. सकाळच्या वेळेस धारबांदोडा परिसरात दोन म्हशींना एका वाहनाने धडक दिली. या धडकेमुळे दोन्ही म्हशी रस्त्याच्या मधोमध पडून राहिल्या होत्या. त्याच वेळी विरुद्ध दिशेने येणाऱ्या कर्नाटकात नोंदणीकृत कारने मृत म्हशीला चुकवण्याचा प्रयत्न केला आणि चालकाचा ताबा सुटल्याने ती थेट दरीत जाऊन कोसळली.

घटनेची माहिती मिळताच फोंडा पोलिस तात्काळ घटनास्थळी दाखल झाले. त्यांनी स्थानिक नागरिकांच्या मदतीने बचावकार्य राबवत कारमधील जखमी चालकाला बाहेर काढले आणि तातडीने रुग्णालयात दाखल केले.

दरम्यान, या अपघातामुळे पुन्हा एकदा रस्त्यांवर मोकाट फिरणाऱ्या जनावरांच्या समस्येकडे लक्ष वेधले जात आहे. रस्त्यांवर फिरणारी जनावरे व त्यांना वाहनांची होणारी धडक ही अनेक अपघातांना कारणीभूत ठरत आहे.