Cunchelim Spring Garbage: कुचेलीच्या झऱ्यात दिवसेंदिवस कचऱ्याच्या ढिगाऱ्यांत वाढ

निसर्गरम्य गोवा राज्याच्या सौंदर्याला आता मानवी निष्काळजीपणाचा धोका निर्माण झाला आहे. उत्तर गोव्यातील कुचेली गावातील प्रसिद्ध आणि नैसर्गिकदृष्ट्या सुंदर असलेल्या झऱ्याचे सौंदर्य आता धोक्यात आले आहे. अनेक पर्यटकांच्या निष्काळजीपणामुळे हा झरा आता कचराकुंड बनू लागला आहे, ज्यामुळे पर्यावरणाचा गंभीर प्रश्न निर्माण झाला आहे. एकेकाळी स्वच्छ आणि निर्मळ पाणी असलेला हा झरा आता प्लास्टिक आणि इतर कचऱ्याच्या ढिगाऱ्यांनी भरलेला आहे. या झऱ्यात आणि त्याच्या आजूबाजूला प्लास्टिकच्या बाटल्या, पाण्याच्या पिशव्या, खाद्यपदार्थांचे वेस्टन, थर्माकोलचे ग्लास आणि दारूच्या रिकाम्या बाटल्यांचा ढिग साचलेला दिसत आहे. पाण्याच्या प्रवाहातून येणारा हा कचरा झऱ्याच्या तळाशी आणि किनाऱ्यावर साचत असल्याने त्याचे नैसर्गिक सौंदर्य पूर्णपणे नष्ट होत आहे. विशेषतः प्लास्टिक आणि थर्माकोलचा कचरा पाण्यासाठी अत्यंत हानिकारक ठरतो. हा कचरा पाण्यात विघटित न झाल्याने पाण्याचे प्रदूषण वाढत आहे.