Goa Live Updates: वास्कोतील बेपत्ता मुलगा सापडला प्रयागराजमध्ये

ट्यूशनला जातो म्हणून ८ सप्टेंबरला दुपारी ३ वाजता घराबाहेर पडलेला चौदा वर्षीय मुलगा प्रयागराज येथे त्याच्या नातेवाईकाकडे पोहोचला. त्या मुलाला वास्कोला आणण्यासाठी त्याचे नातेवाईक प्रयागराजला जाणार आहेत. तो बेपत्ता झाल्यासंबंधी त्याच्या वडिलांनी मुरगाव पोलिस स्थानकात तक्रार केली होती. पोलिसांनी ही तक्रार अपहरण म्हणून नोंद केली होती.

वेर्णा येथील कोकण रेल्वे यार्ड परिसरात काँक्रिट मिक्सरची धडक बसल्याने सुदाम गायकवाड(५३)हा मरण पावला. याप्रकरणी वेर्णा पोलिसांनी मिक्सर चालक सुभान आलम विरोधात गुन्हा नोंदवला आहे. सदर घटना ११ रोजी दुपारी १२.३० वा. घडली. मूळचा बिहारचा सुभान आलम हा मिक्सर चालवत होता.