Goa Today's News Live: अवकाळी पावसामुळे सुपारीचे पीक उद्ध्वस्त

राज्यात गेल्या काही दिवसांपासून अवकाळी पावसानं थैमान घातलं आहे. आगापूर, फोंडा येथे मुसळधार पावसामुळे सुपारीचे पीक उद्ध्वस्त झाले.

मडगाव वाहतूक पोलिसांनी शहरातील तरुणांमध्ये वाढत्या प्रमाणात आढळणाऱ्या मॉडिफाइड बाईक सायलेन्सर वापरावर कठोर कारवाई सुरू केली आहे. या संदर्भात वाहतूक पोलिस निरीक्षक संजय दळवी यांनी चेतावणी देताना सांगितले की, “मॉडिफाइड सायलेन्सरमुळे होणारे ध्वनी प्रदूषण हे केवळ समाजासाठी त्रासदायक नाही, तर तो कायद्याने दंडनीय गुन्हा आहे.”

राज्यात यंदा ऑक्टोबर महिन्यात चांगलाच पाऊस पडल्याची नोंद हवामान खात्याने केली आहे. १ ते ३१ ऑक्टोबर दरम्यान गोव्यात सरासरी १४.७८ इंच पाऊस झाला असून, हा गेल्या ९७ वर्षांतील ऑक्टोबर महिन्यातील पाचव्या क्रमांकाचा सर्वाधिक पाऊस असल्याचे हवामान विभागाने सांगितले आहे.

गोव्यात ओला ईव्ही बाईकची विक्री रोखली आहे. सहाय्यक परिवहन संचालकांशी झालेल्या बैठकीनंतर ओला वापरकर्त्यांना याबाबत माहिती देण्यात आली.

गोवा माध्यमिक आणि उच्च माध्यमिक शिक्षण मंडळ डिसेंबर २०२५ साठी गोवा शिक्षक पात्रता परीक्षा (GTET) घेणार आहे.

सरदार वल्लभभाई पटेल यांच्या जयंतीनिमित्त गोव्यात एकता दौड आयोजित करण्यात आली. काम्पाल ते पणजी आयोजित या दौडमध्ये मुध्यमंत्री प्रमोद सावंतही सहभागी झाले होते.

पाळीव कुत्र्याला जवळून गोळी घातल्याची घटना हळदोणा येथे घडली आहे. यात कुत्र्याचा जबड्याला गंभीर दुखापत झाली आहे. त्याला उपचारासाठी रुग्णालयात दाखल करण्यात आले आहे. पोलिसांनी याप्रकरणी अग्निशस्त्र बाळगल्याप्रकरणी तसेच, गोळी झाडल्याप्रकरणी गुन्हा नोंद केला आहे.