Goa Badminton Tournament : राज्य मानांकन बॅडमिंटन स्पर्धेत हर्ष, यश, अर्जुन, पार्थ अंतिम फेरीत दाखल

Goa Badminton Tournament : बीपीएस स्पोर्टस क्लबने गोवा बॅडमिंटन असोसिएशन व गोवा क्रीडा प्राधिकरणाच्या सहकार्याने घेतलेल्या राज्य मानांकन बॅडमिंटन स्पर्धेत १७ वर्षांखालील मुलांच्या एकेरीत हर्ष माने व यश देसाई यांच्यात, तर १९ वर्षांखालील मुलांच्या एकेरीत अर्जुन भगत व पार्थ जोशी यांच्यात विजेतेपदासाठी लढत होईल. स्पर्धा नावेली येथील मनोहर पर्रीकर इनडोअर स्टेडियममध्ये सुरू आहे.

उपांत्य फेरीत १७ वर्षांखालील मुलांत हर्ष माने याने सी. के. शाहीन याच्यावर २१-११, २१-१४ असा, तर यश देसाईने युसूफ शेख याच्यावर २१-११, २२-२० असा विजय मिळविला. १९ वर्षांखालील मुलांत अर्जुन भगत याने हर्ष माने याला २१-१५, २१-१९ असे, तर पार्थ जोशीने रुतव कणबर याला २१-१४, २१-१७ असे हरविले.

मुलींच्या १७ वर्षांखालील वयोगटातील एकेरीत के. साक्षी व रितिका चेल्लुरी यांच्यात अंतिम सामना खेळला जाईल, तर या १९ वर्षांखालील वयोगटातील मुलींच्या एकेरीत के. साक्षी व ट्विंकल सुल्लद यांच्यात अंतिम लढत होईल.

१७ वर्षांखालील मुलांच्या दुहेरीत अर्जुन भगत-यश देसाई व हर्ष माने-सी. के. शाहीन यांनी अंतिम फेरी गाठली. १७ वर्षांखालील मुलींच्या दुहेरीत आद्या चौरासिया-लक्षिता सावळ जोडीसमोर मिनोष्का परेरा-सिन्नोव्हिया डिसोझा जोडीचे आव्हान असेल.

१७ वर्षांखालील मिश्र दुहेरीत सी. के. शाहीन-के. साक्षी विरुद्ध युसूफ शेख-सुफिया शेख, १९ वर्षांखालील मुलांच्या दुहेरीत अश्मीत पार्सेकर-यश देसाई विरुद्ध पार्थ जोशी-श्रीजय नाईक, तर १९ वर्षांखालील मिश्र दुहेरीत श्रीजय नाईक-ट्विंकल सुल्लद विरुद्ध रुद्र फडते-निधी देसाई अशा अंतिम लढती होतील.