Parra Road Traffic Issue: गोव्यातील 'डियर जिंदगी रोड' वाहतूक कोंडीच्या विळख्यात! पर्यटकांच्या सेल्फीच्या नादात रहदारीला अडथळा

Traffic Problem On Parra Road: राज्यात वाहतूक कोंडीची समस्या फक्त शहरातील रस्त्यांवरच मर्यादित न राहता गावागावातील रस्तेही आता गाड्या आणि हॉर्नच्या आवाजात गजबजू लागले आहेत. म्हापसातील पर्रा रोडही याला अपवाद ठरला नाही. "डियर जिंदगी रोड" म्हणून ओळखल्या जाणार्‍या प्रसिद्ध पर्रा रोडवर सध्या वाहतूक कोंडीची समस्या पाहायला मिळत आहे.

चित्रपटांमुळे प्रसिद्ध झालेल्या पर्रा रोडवर पर्यटकांची रेलचेल वाढली आहे. इथे येणारे पर्यटक कसेही गाड्या पार्क करत असल्यामुळे वाहतुकीला अडथळा निर्माण होत असल्याचे सांगण्यात येत आहे. तसेच फोटो-व्हिडिओ काढण्याच्या नादात अनेकदा पर्यटक रस्त्याच्या मधोमध येत असल्यानेही हे प्रमाण वाढले आहे. यामुळे राहिवाशांची मोठ्या प्रमाणात गैरसोय होत आहे.

स्थानिक रहिवाशांनी काही पर्यटकांच्या अनादरपूर्ण वागण्याबद्दल नाराजी व्यक्त केली आहे. गोव्यात फिरण्यासाठी आल्यानंतर सेल्फी, फोटो किंवा व्हिडिओ काढणे चुकीचे नसले तरी इथे येणाऱ्या पर्यटकांनी वाहतुकीच्या नियमांची जाणीव ठेवली पाहिजे आणि वाहतुकीसाठी रस्त्याचा वापर करणाऱ्यांचा आदर केला पाहिजे.

सध्या सुरू असलेल्या समस्येकडे लक्ष वेधण्यासाठी स्थानिक पंचायतीने रस्त्याच्या एका टोकाला पर्रा चर्चजवळ पे पार्किंगची सुविधा सुरू केली आहे. पर्राचे सरपंच चंदू हरमलकर यांनी पंचायतीच्या प्रयत्नांवर भर देताना सांगितले की, या सततच्या समस्येचा सामना करण्यासाठी, स्थानिक पंचायतीने चर्चच्या शेवटच्या बाजूला पे पार्किंगची सुविधा उभारण्यासाठी पुढाकार घेतला. मात्र, रस्त्याच्या दुसऱ्या टोकाला सध्या नियोजित पार्किंग उपलब्ध नाही. पे पार्किंग सुविधेसाठी जमीन खाजगी मालकाकडून अधिग्रहित करून पंचायतीच्या अधिकारक्षेत्रात सोपवण्यात आली आहे.

या प्रयत्नांना न जुमानता, काही पर्यटक नियमांकडे दुर्लक्ष करून त्यांची वाहने रस्त्यावरच उभी करतात, ज्यामुळे स्थानिक रहिवाशांमध्ये आणखी निराशा निर्माण झाली आहे.

रहदारीची कोंडी कमी करण्यासाठी आणि पर्रा मधील प्रत्येकासाठी वाहतूक सुविधा सुरळीत करण्यासाठी पर्यटन आणि स्थानिक गरजा यांच्यात समतोल साधणे आवश्यक असल्याचे मत नागरिकांनी व्यक्त केले आहे.