Quepem: केपे गणेशोत्‍सवाची लॉटरी ठरली 'हिट', काही तासांतच 1.5 लाख तिकिटांची विक्री

केपे: केपे सार्वजनिक गणेशोत्सव मंडळाने यंदाही महाप्रसाद पावतीसाठी आलिशान वीस चारचाकी वाहने बक्षीस रूपात ठेवली. काही वेळातच दीड लाख म्‍हणजे सर्वच्‍या सर्व तिकिटांची विक्री झाली. एका तिकिटाची किंमत ५०० रुपये आहे.

केपे गणेशोत्‍सव मंडळाच्‍या देणगी कुपन खरेदीसाठी दरवर्षी झुंबड उडते. आज सुमारे एक-दीड किलोमीटर रांग लागली होती. कुपन मिळविण्यासाठी काल रात्रीपासूनच काहींनी ठाण मांडले होते.

यंदा पहिले बक्षीस बीएमडब्ल्यू कार तर दुसरे ऑडी क्यू-३ ही आलिशान कार ठेवण्यात आले आहे. तसेच थार, विंडसर, ग्रँड विटारा, क्रेटा यांसारख्या २० गाड्याही बक्षीस रुपाने मिळणार आहेत. सर्व दीड लाख तिकिटे काही तासांतच संपली, असे मंडळाचे अध्यक्ष नीलेश फळदेसाई यांनी सांगितले.

रक्तदात्‍यांसाठी सवलत

दरवर्षीप्रमाणे यावर्षीही मंडळाने रक्तदान शिबिर आयोजित केले होते. काल १ ऑगस्ट रोजी २५० रक्तदात्यांनी रक्तदान केले तर उद्या ३ रोजी सुमारे २०० दाते रक्तदान करणार आहेत. रक्तदात्यांसाठी रांगेत उभे न राहता तिकीट खरेदी करता येईल, असे नीलेश फळदेसाई म्‍हणाले.