Pandurang Madkaikar: ..ती रक्कम तर सरकारी शुल्क! पांडुरंग मडकईकरांचा ‘यू-टर्न’; 19 मार्च रोजी सुनावणी

Pandurang Madkaikar statement

पणजी: भाजपचे राष्ट्रीय सरचिटणीस बी. एल. संतोष यांची भेट घेऊन आल्यानंतर पक्षातीलच मंत्र्यासाठी आपण किरकोळ कामासाठी १५ - २० लाख रुपये दिल्याचा आरोप करणारे माजी मंत्री पांडुरंग मडकईकर यांनी आता ‘यू-टर्न’ घेतला असून ‘आपण कोणाला पैसे दिले नाहीत, तर दिलेली रक्कम ही सरकारी कामाचे शुल्क होते’, असे त्यांचे म्हणणे आहे.

‘गोमन्तक’शी बोलताना मडकईकर यांनी सांगितले की, सध्या आपण काही बोललो आहे, ती पक्षांतर्गत बाब आहे. पक्षांतर्गत त्याविषयी चौकशी सुरू आहे. तत्पूर्वी ४ मार्च रोजी संतोष यांना भेटून आल्यानंतर प्रसिद्धी माध्यमांकडे बोलताना मडकईकर यांनी सरकारमधील भ्रष्टाचारावर सडकून टीका केली होती. किरकोळ कामासाठी एका मंत्र्याला १५ - २० लाख रुपये द्यावे लागल्याचा आरोप केला होता. याची आठवण करून देताच, मडकईकरांनी ती रक्कम सरकारी शुल्क असल्याचे सांगत घुमजाव केले.

भाजपच्याच मंत्र्यांवर मडकईकर यांनी केलेल्या आरोपांची राष्ट्रीय पातळीवरील वृत्तवाहिन्यांनी दखल घेतली होती. त्यामुळे राज्यातील भाजप सरकारला तो एक धक्काच होता. मडकईकरांच्या या आरोपांमुळे विरोधकांच्या हाती आयतेच कोलीत मिळाले होते. त्यामुळे विरोधकांनी चोहोबाजूंनी भाजप सरकारवर टीका करण्याची संधी सोडली नाही. याशिवाय आता अर्थसंकल्पीय अधिवेशन काही दिवसांवर येऊन ठेपले आहे. त्यामुळे विधानसभेच्या कामकाजात विरोधक मडकईकरांच्या आरोपांवरून सरकारला घेरण्याची शक्यता दिसल्यानेच कदाचित पक्षातून मडकईकरांना पक्षशिस्त पालनाचे आदेश दिले असावेत, असे दिसते.

१९ मार्च रोजी सुनावणी

मडकईकर यांनी आरोप केल्यानंतर लाचलुचपत प्रतिबंधक विभागाच्या पोलिस निरीक्षकांकडे या प्रकरणाची चौकशी करावी, यासाठी सामाजिक कार्यकर्त्यांनी लेखी तक्रार केली होती. शिवाय एसीबी पोलिस अधीक्षकांकडेही तक्रार केली होती. तरीही त्या तक्रारींची आठवडाभर दखल घेतली नव्हती. त्यामुळे तक्रारदारांनी जिल्हा सत्र न्यायालयात धाव घेतली. त्यानंतर न्यायालयाने एसीबी अधीक्षक व निरीक्षकांना नोटिसा पाठवल्या. त्यानुसार १९ मार्च रोजी त्यावर सुनावणी होणार आहे.

...अन् त्यांनी वेळ मारून नेली!

पैसे दिल्याचा आरोप केल्यानंतर रात्री आपणास संबंधित मंत्र्याने पैसेही परत केल्याची चर्चा सुरू झाली होती, ते खरे आहे काय? अशी विचारणा केली असता मडकईकर यांनी, मी कोणा मंत्र्याला पैसे दिले नाहीत आणि कोणी मलाही पैसे दिले नाहीत, असे सांगून वेळ मारून नेली.