Mapusa Market: 'माशांची किरकोळ विक्री बंद करा'! म्हापसा मार्केट मासळी विक्रेता संघटनेचा इशारा

म्हापसा: येथील पालिका बाजारपेठेतील मासळी मार्केटबाहेर घाऊक विक्रेत्यांनी सुरू केलेल्या कथित किरकोळ मासळी विक्रीस इतर मासळी विक्रेत्यांनी तीव्र आक्षेप घेतला. वजनकाटा घेऊन सुरू केलेला हा किरकोळ विक्री व्यवसाय शनिवारपासून ताबडतोब बंद करण्याची सूचना संबंधितांना म्हापसा मार्केट मासळी विक्रेता संघटनेने केली आहे.

मासळी विक्रेत्यांचा वाढता विरोध पाहून म्हापसा मासळी विक्रेत्या संघटनेच्या अध्यक्षा शशिकला गोवेकर यांनी यात हस्तक्षेप केला. यापुढे कोणत्याही घाऊक विक्रेत्याला म्हापसा मासळी मार्केटच्या आवारात राहून किरकोळ मासळी विक्री करू दिली जाणार नाही, असे गोवेकर यांनी सांगितले.

म्हापसा मासळी मार्केटमधील विक्रेत्यांना मासळी पुरवठा करणारे घाऊक विक्रेते हे सकाळी ६ ते ९.३० पर्यंत मार्केटच्या बाहेरच किरकोळ मासळी विक्री करतात. परिणामी बाजारात मासळी खरेदी करण्यासाठी कुणीही ग्राहक येत नाही. त्यामुळे याच घाऊक विक्रेत्यांकडून खरेदी केलेली मासळी विकली जात नाही आणि ही मासळी विकण्यासाठी सांयकाळी उशिरापर्यंत बाजारात विक्रेत्या महिलांना ग्राहकांच्या प्रतीक्षेत वाट पाहावी लागते, असे गोवेकर यांनी सांगितले.

मासळी विक्री महिलांनी सांगितले की, घाऊक विक्रेते गाड्या भरून मासळी घेऊन येतात. त्यांनी आम्हाला किरकोळ विक्री व्यवसाय करणाऱ्यांना घाऊक मासळी देऊन त्यांनी माघारी जायला हवे. मात्र ते इथेच वजनकाटा घेऊन किरकोळ विक्री करतात. त्यामुळे आम्हाला ग्राहक मिळत नाहीत आणि रात्री ८ वाजेपर्यंत आम्हाला बाजारात मासळी विक्रीसाठी थांबावे लागते. आम्ही चार-चार मासळीचे वाटे घेऊन व्यवसाय करतो, तरीही हे घाऊक विक्रेते आम्हालाच त्रास करतात. त्यामुळे उद्यापासून हा प्रकार बंद करण्यास आम्ही सांगितला आहे.

म्हापसा मासळी मार्केटमध्येच असा हा प्रकार फक्त चालतो. म्हापसा मार्केटमध्ये कुणीही येतो आणि व्यवसाय करतो, असे गोवेकर यांनी सांगितले.

किरकोळ विक्रेत्यांना इशारा

घाऊक विक्रेत्यांमुळे आपला हा व्यवसाय ठप्प झाल्याच्या पार्श्वभूमीवर शुक्रवारी सकाळी म्हापसा मासळी मार्केटमधील मासळी विक्रेत्या महिला एकत्रित झाल्या व त्यांनी किरकोळ व्यवसाय करणाऱ्या घाऊक विक्रेत्यांना जाब विचारला. यापुढे वजनकाटा घेऊन किरकोळ विक्री केल्यास परिणाम योग्य होणार नाहीत, असा सज्जड इशारा दिला.