Goa: '..बेड्स नाकारले, उद्धटपणे वागले'! हॉस्‍पिसियोत ज्येष्ठ नागरिकाचा मृत्यू; कुटुंबीयांचे व्यवस्थापनावर आरोप

मडगाव: दक्षिण गोव्‍याचे जिल्‍हा इस्‍पितळ असलेल्‍या हॉस्‍पिसियो इस्‍पितळात खाट नसल्‍याचे सांगून एका ज्‍येष्‍ठ नागरिकाला ॲडमिट करून घेण्‍यास नकार दिल्‍यानंतर त्‍याला खासगी इस्‍पितळात दाखल करण्‍यात आले. मात्र तिथे त्‍याची प्रकृती आणखी ढासळल्‍याने त्‍याला पुन्‍हा हॉस्‍पिसियोत आणण्‍यात आले. पण तोपर्यंत वेळ निघून गेली होती. या रुग्‍णावर वेळीच योग्‍य ते उपचार न झाल्‍याने त्‍याला आपले प्राण गमवावे लागले.

या घटनेमुळे दक्षिण गोवा जिल्हा इस्पितळ सध्या वादाच्या भोवऱ्यात सापडले असून या इस्पितळातील डॉक्टर व अन्य कर्मचाऱ्याच्या अनास्थेमुळे या ६९ वर्षीय रुग्णाला आपला जीव गमवावा लागला असा आरोप मयताच्या कुटुंबीयांनी केला आहे. संबंधितांनी यासंबंधी फातोर्डा पोलिस ठाण्यात तक्रार नोंदविली आहे. त्यात डॉक्टर व अन्य कामगारांनी रुग्णाकडे दुर्लक्ष केल्याने त्यांना एका खासगी इस्पितळात दाखल करण्याची वेळ आली. वेळीच त्यांच्यावर उपचार न झाल्याने त्यांना मरण आले असा आरोप करून, संबंधितांवर कारवाई करण्‍याची मागणी केली आहे.

सिने लता जवळ राहणारे जगदीश जामुनी (६९) असे या मयताचे नाव असून प्रकृती बिघडल्याने त्यांना येथील दक्षिण गोवा जिल्हा इस्पितळात नेले असता खाट उपलब्ध नसल्याचे कारण पुढे करून त्यांना अॅडमिट करून घेण्यास नकार देण्यात आला.

नंतर त्यांना एका खासगी इस्पितळात दाखल केले, मात्र प्रकृती खालावल्याने त्यांना पुन्हा या शासकीय इस्पितळात नेले असता, त्यावेळीही खाट उपलब्ध नसल्याचे कारण पुढे करण्यात आले. दुसऱ्या दिवशी खाट उपलब्ध करून दिली पण ऑक्सिजनचा पुरवठाही केला नाही. रुग्णाची प्रकृती चिंताजनक असतानाही मुख्य डॉक्टरांनी त्यांची तपासणी केली नाही. परिचारिका व अन्य कर्मचारीही त्‍यांच्‍याशी उद्धटपणे वागले, असा आरोप मयताच्या कुटुंबीयांनी केला आहे.

फातोर्डा पोलिसांशी संपर्क साधला असता, तक्रार आली असून पुढील चौकशी सुरू असल्याचे सांगण्यात आले. दोन दिवसांपूर्वी याच इस्पितळात खाटा उपलब्ध नसल्याने अन्नातून विषबाधा झालेल्या युवतीला खासगी इस्पितळात उपचार घ्यावे लागल्याची घटना घडली होती. अशा घटनेची नेहमीच पुनरावृत्ती होत असल्याचे नागरिकांचे म्हणणे आहे.