Goa To Bhuj: 'शं नो वरुणः' भारतीय नौदलाच्या सागरी जागरुकता कार मोहिमेला दाबोळीतून आरंभ

Maritime Awareness Car Expedition: भारतीय नौदलाच्या सागरी जागरुकता कार मोहिम “ शं नो वरुणः”च्या चौथ्या टप्प्याला दाबोळी येथून आरंभ झाला. भारतीय नौदलाच्या गोवा विभागाचे ध्वजाधिकारी रिअर अॅडमिरल विक्रम मेनन यांच्या हस्ते हिरवा झेंडा दाखविण्यात आला.

कमांडर अनिरुध्द रॉय यांच्या नेतृत्वाखाली वेस्टर्न नेव्हल कमांड टीममध्ये सेवारत अधिकारी (महिला अधिकाऱ्यांसह), नौसेनिक व इतर असे 43 जण सहभागी झाले आहेत. पश्र्चिम क्षेत्राच्या नौदल महिला कल्याण संघटनेच्या अध्यक्ष शशी त्रिपाठी यासुध्दा सहभागी झाल्या आहेत. सदर पथक 19 एप्रिलपर्यंत 3,000 किलोमीटर कापून भुजला पोहचणार आहे.

सदर पथक गोवा, महाराष्ट्र, गुजरात या किनारी राज्यांतून जाताना तेथील विविध शाळा, वृध्दाश्रम, अनाथाश्रम इत्यादींना भेटी देणार समुदाय विकास व सक्षमीकरणासाठी योगदान देईल. समुद्र किनारयांची स्वच्छता, नौदलाबद्दल जागृती मोहिम, विद्यार्थी, एनसीसी कॅडेट,ज्येष्ठ नागरिक व इतर मान्यवरांशी संवाद साधण्यात येणार आहे.

अलिबाग येथील आंग्रे वॉर मेमोरियल व दीव येथील खुकरी मेमोरियल ला भेटी देऊन शूरवीरांना श्रध्दांजली वाहणार आहे. कार रॅलीचा मुख्य उद्द्श भारतीय नौदल, करिअर संधी, उपलब्धी यासंबंधी सर्वसामान्यांमध्ये जागरुकता निर्माण करणे हा आहे.