Sub-Junior Aquatics Championships: गोव्याच्या पूर्वी नाईकचा राष्ट्रीय जलतरण स्पर्धेत दमदार परफॉर्मन्स; 2 सुवर्ण, 1 रौप्य जिंकलं

पणजी: गोव्याची प्रतिभावान तरुण जलतरणपटू पूर्वी रितेश नाईक हिने आपल्या जबरदस्त कामगिरीने पुन्हा एकदा गोव्याचा झेंडा उंचावला आहे. बेंगळुरू येथे पार पडलेल्या ४१ व्या राष्ट्रीय सब-ज्युनियर अ‍ॅक्वाटिक्स चॅम्पियनशिपमध्ये तिने दोन सुवर्ण आणि एक रौप्य पदक जिंकत सर्वांचे लक्ष वेधून घेतले.

स्पर्धेत गट III मुलींच्या गटात तिला विजेता घोषित करण्यात आले. मंगळवारी पूर्वीने १०० मीटर फ्रीस्टाइलमध्ये सुवर्णपदक पटकावले.

तर ४०० मीटर फ्रीस्टाइलमध्ये रौप्य पदक मिळवले. त्याआधी २०० मीटर फ्रीस्टाइल स्पर्धेतही सुवर्ण जिंकून तिने आपल्या विजयी मालिकेची नोंद केली.

पूर्वी सध्या म्हापसा येथील खेलो इंडिया स्टेट सेंटर ऑफ एक्सलन्समध्ये प्रशिक्षक सुजित टी ए यांच्या मार्गदर्शनाखाली सराव करते. तिच्या सातत्यपूर्ण मेहनतीमुळे आणि तल्लख कौशल्यामुळे ती गोव्याची जलतरण क्षेत्रातील एक उज्वल आशा ठरत आहे.