Goa Shimgotsav Festival : डिचोली शांतादुर्गा मठ मंदिरात नाट्यमहोत्सव; शिमगोत्सवानिमित्त आयोजन

Goa Shimgotsav Festival :

डिचोली, आतीलपेठ-डिचोली येथील श्री शांतादुर्गा मठ मंदिरात यंदाही शिगमोत्सवानिमित्त नाट्यमहोत्सवाचे आयोजन करण्यात आले असून, महानाट्यासह दर्जेदार नाटकांचे सादरीकरण होणार आहे.

श्री शांतादुर्गा भायलीपेठ महाजन आणि भायलीपेठ बाजारकर दहाजण मंडळातर्फे या नाट्यमहोत्सवाचे आयोजन करण्यात आले आहे, अशी माहिती मंडळातर्फे सुदत्त मांद्रेकर यांनी पत्रकार परिषदेत दिली.

यावेळी डॉ. कौस्तुभ पाटणेकर, पांडुरंग तेली, कृष्णनाथ फोगेरी, पंकज तेली उपस्थित होते.

मंगळवारी (ता. २) रात्री ९ वा. नाट्यमहोत्सवाचे उद्‍घाटन होणार आहे. तद्नंतर १०१ कलाकारांचा सहभाग असलेले संगीत ‘ईश्वर निष्ठांची मंदियाळी’ हे महानाट्य सादर करण्यात येणार आहे.

महिला कलाकारांतर्फे नाटक

बुधवारी (ता. ३) रात्री ९.४५ वा. महिला कलाकारांतर्फे सं. ‘कैकयी’ हे नाटक सादर करण्यात येणार आहे. ललिता बापट लिखित या नाटकाचे दिग्दर्शन मानसी वाळवे यांनी केले आहे. गुरुवारी (ता. ४) रात्री ९.४५ वा. ‘देव नाही देव्हाऱ्यात’ हे नाटक सादर करण्यात येणार आहे. मो. दा. देशमुख लिखित या नाटकाचे दिग्दर्शन उदय धुपकर यांनी केले आहे.

शुक्रवारी (ता. ५) रात्री ९.४५ वा. ‘श्रद्धा मरी आईची’ हे नाटक होणार असून विजय खानविलकर लिखित या नाटकाचे दिग्दर्शन नरेश कडकडे यांनी केले आहे. शनिवारी (ता. ६) रात्री ९.४५ वा. ‘आतां करपाचें कितें’ हे महेश नायक लिखित नाटक होणार असून गौतम गावडे यांनी दिग्दर्शन केले आहे. रविवारी (ता. ७) रात्री ९.४५ वा. ‘एक दुजे के लिए’ हे नाटक होणार असून राघवेंद्र काणकोणकर लिखित या नाटकाचे नरेश कडकडे यांनी दिग्दर्शन केले आहे.

रविवारी विरभद्र उत्सव

शिगमोत्सवाचे वैशिष्ट्य असलेला विरभद्र उत्सव येत्या रविवारी (ता. ७) होणार आहे. रात्री ९ वा. पारंपरिक पद्धतीने विरभद्र नृत्य होणार आहे. सोमवारी (ता. ८) सकाळी ११ वा. मठ मंदिरात देवीचा कौल होणार आहे. सायंकाळी धुलीवंदन होऊन शिमगोत्सवाची सांगता होणार आहे.