Goa Agriculture: पडिक जमिनीत किफायतशीर शेती; 170 एकरमध्ये लागवड

Goa Agriculture: चिंचोणे गावात चिंचोणे कोमुनिदाद व या कोमुनिदादचे अध्यक्ष आग्नेल फुर्तादो यांनी पुढाकार घेऊन चिंचोणे कृषी क्लबची स्थापना केली असून पडिक जमिनीचे रूपांतर कृषी उत्पादनासाठी वापरणे हे लक्ष्य ठेवले आहे.

या क्लबमध्ये सध्या 50 पेक्षा जास्त शेतकरी एकत्रित आले असुन गेल्या 30 वर्षांपासून पडिक असलेल्या 500 एकर जमिनीतील 170 एकर जमिनीवर शेती लागवड सुरू केली आहे. त्यामुळे हा परिसर हिरवागार झाला आहे.

गोव्यात ग्रामीण भागात लाखो चौरस मीटर पडिक जमिनी आहेत. पण त्यांचा योग्य वापर करण्याकडे कोणी लक्षच देत नाहीत, अशी परिस्थिती आहे.

सुरवातीला या पडिक जमिनीचे शेतीमध्ये रूपांतर करताना बरेच त्रास झाले. तपकिरी तांदळाचे उत्पादन करण्यात आले. याकामी आम्हाला डॉन बॉस्को कृषी इन्स्टिट्यूटचे फा. जॉर्ज क्वाद्रोस यांचे मार्गदर्शन व सहकार्य लाभले.

आता हळूहळू यामध्ये फायदा होत आहे. सध्या वायंगण (खरीप)चे पीक, अळसांदे, काळिंग व इतर भाज्यांची लागवड सुरू केली आहे. जलस्त्रोतमंत्री सुभाष शिरोडकर यांनीही आम्हाला चांगली मदत केल्याचे फुर्तादो यांनी सांगितले.

तरुणांचा कल आधुनिक तंत्रज्ञानाकडे

वेगवेगळे उपक्रम राबवून व आधुनिक तंत्रज्ञानाचा वापर करून भाज्या किंवा फळे उत्पादन करण्याकडे तरुणांचा कल दिसत आहे.

कमी कष्ट आणि अधिक काम, याकडे युवकांचा कल आहे. गोव्यात कमीतकमी 30 हजार शेतकरी तयार व्हावेत, अशी हल्लीच जलस्त्रोत व सहकारमंत्री सुभाष शिरोडकर यांनी एका कार्यक्रमात इच्छा व्यक्त केली होती. सरकारने कृषी क्षेत्राच्या विकासासाठी अनेक उपक्रम राबविले असून अनेक योजनाही जाहीर केल्या आहेत.

या गावात कृषी क्षेत्राचा विकास करणे हे क्लबचे मूळ तत्त्व आहे. शिवाय पडिक जमिनी कचरा फेकण्यासाठी वापरात येऊ नयेत, या जमिनींवर बिल्डर्सनी नजर ठेवू नये, अशीच आम्हा सर्वांची भावना आहे. आमच्या पूर्वजांनी या जमिनींचे रक्षण केले आहे, त्यांचा आदर करणे हेही आमचे कर्तव्य आहे. - आग्नेल फुर्तादो, चिंचोणे कोमुनिदादचे अध्यक्ष