पणजी: ग्रामसेवक असूनही पंचायत सचिव या नात्याने काम करणाऱ्या सांकवाळ पंचायतीच्या सचिवावर कारवाई करण्यासाठी पंचायत संचालनालयात हालचाल सुरू झाली आहे. सोमवारी चौकशीसाठी निलंबनाचा आदेश जारी केला जाऊ शकतो, अशी खात्रीलायक माहिती मिळाली आहे.
या ग्रामसेवकाविरोधात अनेक तक्रारी दाखल झाल्या आहेत. काही तक्रारी दक्षता खात्यापर्यंतही पोचल्या होत्या. लाचलुचपत प्रतिबंधक विभागाने चौकशी करून अहवाल दक्षता खात्याला सादर केला होता.
दक्षता खात्याने मुख्य दक्षता अधिकारी या नात्याने राज्याचे मुख्य सचिव डॉ. व्ही. कंदवेलू यांना अहवाल सादर केला होता. त्यांनी ‘निलंबन करून चौकशी करावी’, असा शेरा त्या फाईलवर मारून ती पुढील कार्यवाहीसाठी पंचायत संचालनाला पाठवली होती.
विधानसभेत फातोर्ड्याचे आमदार विजय सरदेसाई यांनी ग्रामसेवक ऑर्व्हिले वेलीस या सांकवाळच्या सचिवरूपी ग्रामसेवकाचे निलंबन केव्हा, अशी जोरदार विचारणा सरकारला केली होती. मुख्य सचिवांच्या शेऱ्यालाही पंचायत संचालक जुमानत नसल्याचा आरोप त्यांनी केला होता.
कोणालाही पाठीशी घालणार नाही : मुख्यमंत्री
विधानसभेत मुख्यमंत्री डॉ. प्रमोद सावंत यांनी याप्रकरणी संबंधितावर कारवाई केली जाईल, कोणालाही पाठीशी घालण्याचा प्रश्न येत नसल्याचे स्पष्ट केले होते. त्यानंतर आता विधानसभेचे अधिवेशन सोमवारी सुरू होण्याआधीच त्या ग्रामसेवकाच्या निलंबनाचा आदेश जारी करण्याची तयारी सुरू झाल्याची माहिती सूत्रांनी दिली.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.