Goa Fish Market: मत्स्यप्रेमींना यंदा मुबलक प्रमाणात आणि वाजवी दरात माशांवर ताव मारता आला, परंतु आता हळूहळू मत्सप्रेमींना मासळी खरेदी करताना विचार करावा लागत आहे. गेल्या महिन्यात शंभर रूपयांना पंधरा ते वीस बांगडे मिळत होते. मात्र आता 7 ते 10 मिळू लागले आहेत. असे असले तरी सध्याचा मासळीचा दर सर्वसामान्यांना परवडेल असाच आहे.
महिन्याभरापूर्वी बांगडा मासा किती खाऊ आणि किती नको असे झाले होते. मत्सप्रेमींना ती एक पर्वणीच ठरली होती मात्र आता दरात वाढ होत आहे. आता थोडा दर वाढत असला तरी गेल्या आठवड्यात 100 रुपयांना बारा ते पंधरा बांगडे विकले जात होते. मोठ्या आकाराचे बांगडे आज 150 रुपये प्रतिकिलो तर मध्यम आकाराचे बांगडे 100 रुपये प्रतिकिलो दराने विकले जात होते.
गोव्यातील ग्रामीण भागात हेच बांगडे शंभर रुपयांना 8 ते 10 नग अशी विक्री सुरू आहे. मासळी बाजारात मुबलक प्रमाणात मासळी होती. यात प्रामुख्याने बांगडे व तारले मासे अधिक होते. तसेच कर्ली, समुद्री खेकडे, सुंगटे, इसवण, लेपो, माणकी आदी मासळीही मुबलक प्रमाणात उपलब्ध होती.
ग्रामीण भागात मासळी महाग
राज्यातील ग्रामीण भागात शहरातून मासळी पुरविली जाते. यासाठी अनेक विक्रेते शहरातून दुचाकी किंवा चारचाकी गाडीतून मासळी विक्रीसाठी जात असतात त्यामुळे त्यांना वाहनाचा, खर्च वाढतो त्यामुळे ग्रामीण भागात शहराच्या तुलनेत मासळी अधिक महाग मिळते. त्यामुळे अनेक ग्रामीण भागात राहणारे नागरिक कामावरून घरी परताना मासळी खरेदी करण्यास अधिक पसंती देतात.
मात्र स्वच्छतेची अत्यंत गरज-
मासळी मार्केटची साफसफाई दररोज केली जाते. मात्र, तेथे मोठ्या प्रमाणात पाणी साचते तसेच मार्केट परिसरातील जागादेखील अडचणीची असल्याने तेथे ग्राहकांना चिखलातून मासळी खरेदी करावी लागते. यासाठी येथे अधिक प्रमाणात स्वच्छतेची आणि प्रामुख्याने नियोजनाची गरज आहे.
मासळीचे दर (प्रतिकिलो)
बांगडे- 100 रु, कर्ली- 300 रु, समुद्री खेकडे- 300 रु, सुंगटे- 300 ते 400 रु, इसवण- 500 ते 550 रु, लेपो- 200 रु.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
