Garbage Collection In Goa प्रत्येक घरात क्युआर कोड स्कॅनर बसवून ठरल्या दिवशीच घरातील कचरा गोळा करण्याच्या मोहिमेला आमोणे पंचायतीने सुरवात केली आहे. आमोणे पंचायत क्षेत्रात आठशेवर घरे आहेत. प्रत्येक घरातील सुका कचरा गोळा करून वेदांता कंपनीसमोरील जागेत साठवला जातो.
कचरा गोळा करण्याच्या कामात सुरळीतपणा यावा तसेच ठरल्या दिवशीच कचरा उचलला जावा यासाठी क्युअार कोड स्कॅनरची मदत घेण्यात आली आहे. त्यामुळे कोणत्या घरातील कचरा कधी उचलला आणि कोणत्या घरांतील कचरा उचलणे बाकी आहे हे पंचायतीला समजणे सोपे जाणार आहे.
येथील कचरा समस्येची गंभीर दखल घेत या भागाचे आमदार तथा मुख्यमंत्री डॉ. प्रमोद सावंत यांनी पंचायत मंडळाबरोबर अनेक बैठका घेतल्या. तसेच मिनरल फाउंडेशन व वेदांता कंपनीचे सहकार्याने क्युआर कोड स्कॅनर योजना राबवण्यास पाठबळ दिले.
क्युआर कोड स्कॅनर बसवण्यात आल्यानंतर आंबेशी येथील गंधा गुरुदास गावस यांच्या घराकडून कचरा गोळा करण्याच्या मोहिमेस प्रारंभ झाला.
यावेळी सरपंच कृष्णा गावस, उपसरपंच दिया सावंत, पंच गौरवी गावस, वसंत सिनारी, सागर फडते, अनिशा आमोणकर, वासुदेव घाडी यांची उपस्थिती होती. सरपंच कृष्णा गावस यांनी मुख्यमंत्री व पंचांच्या सहकार्यातून ही मोहिम सुरू झाल्याचे सांगितले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.