Flights From Dabolim Airport: दाबोळीवरून लवकरच दोन नव्या ठिकाणी विमान उड्डाणे होणार सुरू; देशी पर्यटक वाढण्याची आशा

Goa to Kalaburagi Flight: दाबोळी विमानतळावरून लवकरच कर्नाटकातील कलबुर्गी आणि महाराष्ट्रातील नागपूरला विमानसेवा सुरू होणार असल्याची माहिती विमानतळाचे संचालक एस. व्ही. टी. धनंजय राव यांनी दिली. हिवाळ्यात ही सेवा सुरू होणार आहे.

ते म्हणाले की, भारतीय विमानतळ प्राधिकरण (AAI) दाबोळी विमानतळावर चार्टर आणि आंतरराष्ट्रीय उड्डाणांमध्ये आणखी सुधारणा करण्याच्या तयारीत आहे. चार्टर ऑपरेटर्सनी दाबोळी विमानतळावर 175 स्लॉट बुक केल्याने आगामी हंगाम चांगला असेल, अशी आशा आहे.

ते पुढे म्हणाले की, दाबोळी विमानतळाच्या विस्ताराचे काम मे किंवा जून 2024 पर्यंत पूर्ण होईल. त्यामुळे येत्या हंगामात देशांतर्गत पर्यटकांची संख्या मोठ्या प्रमाणात वाढणार आहे.

मध्यंतरी दाबोळी विमानतळ बंद होणार असल्याची अफवा काही लोकांनी पसरवली होती. मात्र तसे काहीही होणार नाही, अशी पुष्टी परिवहन मंत्री माविन गुदिन्हो यांनी केली. हे सर्वात प्रतिष्ठित विमानतळांपैकी एक आहे आणि एएआयच्या मते, येथील प्रवाशांची संख्या कधीही कमी होणार नाही.

मंत्री गुदिन्हो शुक्रवारी दाबोळी विमानतळावरील एका कार्यक्रमात सहभागी झाले होते. ते म्हणाले, भारतीय विमानतळ प्राधिकरण प्रवाशांच्या हितासाठी सुविधा सुधारण्यासाठी सर्वतोपरी प्रयत्न करत आहे. मुख्यमंत्री प्रमोद सावंत यांच्या नेतृत्वाखालील शिष्टमंडळ लवकरच पंतप्रधान नरेंद्र मोदी आणि नागरी विमान वाहतूक मंत्री ज्योतिरादित्य सिंधिया यांची भेट घेणार आहे.