शापोरा जेट्टीची दुरवस्था; मंत्र्यांकडे मदतीची मागणी

म्हापसा: शापोरा बोट मालक संघटनेने मत्स्यव्यवसाय मंत्री निलखंत हळर्णकर यांना निवेदन देऊन शापोरा जेट्टीची (Chapora Jetty) दुरुस्ती करण्याची मागणी केली. (Chapora jetty needs renovation)

संघटनेने अध्यक्ष भलभीम मालवणकर यांनी निवेदनात म्हटले आहे की, शापोरा जेट्टीच्या दुरुस्तीची आणि संघटनेच्या कार्यालयाच्या नूतनीकरणाची गरज आहे. जेट्टीमध्ये (Jetty) शौचालयासारख्या मूलभूत सुविधांचा अभाव असल्याचेही निवेदनात नमूद करण्यात आले आहे.

दररोज शेकडो लोक स्थानिक तसेच पर्यटक जेट्टीला भेट देतात मात्र मूलभूत सुविधांचा अभाव असल्याने नागरिकांची गैरसोय होते. भलभीम मालवणकर म्हणाले, गेल्या अनेक वर्षांपासून जेट्टीकडे दुर्लक्ष होत आहे. यापूर्वीच्या मत्स्यव्यवसाय मंत्र्यांकडेही आम्ही संपर्क साधला होता, मात्र कोणीही लक्ष दिले नाही. या पत्राद्वारे आम्ही विद्यमान मत्स्यव्यवसाय मंत्र्यांना जेट्टीला भेट देऊन आवश्यक पावले उचलण्याची विनंती केली आहे. याबाबत बोलताना हळर्णकर यांनी माहिती घेऊन शापोरा जेट्टीला भेट देणार असल्याचे स्पष्ट केले आहे.