Chandrakant Shetye: 'सरकारी नोकरीच्यामागे लागू नका', आमदार शेट्येंचा तरुणांना आत्मनिर्भर होण्याचा सल्ला

Chandrakant Shetye Inspires ITI Bicholim Students to Think Beyond Government Jobs

डिचोली: केवळ सरकारी नोकरीच्या मागे लागू नका. आज अनेक पर्याय आणि संधी उपलब्ध आहेत. त्या संधीचा फायदा घेत युवकांनी आत्मनिर्भर बनून स्वतःचे भवितव्य घडवावे, असे मत आमदार डॉ. चंद्रकांत शेट्ये यांनी व्यक्त केले. पालकांना आपल्या मुलांच्या भवितव्याबाबत चिंता आणि दडपण असते. तेव्हा युवा पिढीने वाईट गोष्टीपासून लांब रहावे, असे आवाहनही डॉ. शेट्ये यांनी केले.

डिचोली औद्योगिक प्रशिक्षण केंद्राच्या (आयटीआय) कौशल्य दीक्षांत सोहळ्यात डॉ. शेट्ये प्रमुख पाहूणे या नात्याने बोलत होते. येथील दीनदयाळ सभागृहात शनिवारी (ता. २६) आयोजित या शानदार सोहळ्याप्रसंगी खास पाहूणे म्हणून सरकारी अभियांत्रिकी महाविद्यालयाचे प्राध्यापक रघुवीर च्यारी नाचनोळकर उपस्थित होते. अन्य मान्यवरात जिल्हा पंचायत सदस्य प्रदीप रेवोडकर, ''आयटीआय''चे प्राचार्य कपिल आयगल, ''जीकेबी''चे वरिष्ठ व्यवस्थापक सेड्रिक लोबो यांचा समावेश होता.

या सोहळ्यात वेगवेगळ्या व्यावसायिक ट्रेडमधून तांत्रिक प्रशिक्षण पूर्ण प्रशिक्षणार्थीना मान्यवरांच्या हस्ते प्रमाणपत्रे वितरीत करण्यात आली. रघुवीर नाचनोळकर यांनी यावेळी मार्गदर्शन करताना सरकारच्या योजनांचा लाभ घेत स्वयंरोजगार सुरु करावा, असे आवाहन प्रशिक्षणार्थीना केले.

सुरवातीस प्रशिक्षणार्थीनी स्वागतगीत आणि लोकनृत्य सादर केले. प्राचार्य आयगल यांनी प्रास्ताविक केले. प्रशिक्षक पुष्पराज मांद्रेकर यांनी अहवाल सादर केला. डायना डिसोझा यांनी सूत्रसंचालन केले. संजू नाईक यांनी आभार मानले. या सोहळ्यास प्रशिक्षणार्थीचे पालक उपस्थित होते.