Goa Police: गोव्यातून चोरलेली कार मुरूडेश्वरमध्ये मिळाली! केरळच्या चोरट्यालाही अटक

Goa Police: गोव्यातील कोलवाळ येथून चोरीला गेलेली एक कार पोलिसांनी हस्तगत केली आहे. ही कार कर्नाटकातील मुरूडेश्वर येथून पोलिसांनी ताब्यात घेतली आहे. तसेच ही कार चोरणाऱ्या परप्रांतीय चोरट्यासही पोलिसांनी ताब्यात घेतले आहे हाशिम असे या चोरट्याचे नाव आहे.

कोलवाळ पोलिसांनी ही कामगिरी केली. पोलिसांनी हाशिम ए. एम. (वय 22) याला अटक करण्यात आली आहे. हाशिम हा मूळचा केरळमधील त्रिशुर येथील आहे. पोलिसांनी केलेल्या चौकशीत त्याने गुन्हा कबूल केला आहे.

हाशिम याने कोलवाळ येथून 31 मे रोजी बॅलेनो कार (जीए 05 टी 5490) चोरली होती. त्यानंतर कर्नाटकात मुरूडेश्वर येथे त्याने कोर सोडली होती. पोलिसांनी कारसह त्यालाही ताब्यात घेतले आहे. त्याच्याकडे अधिक चौकशी केली जात आहे.

उत्तर गोव्याचे पोलिस अधीक्षक निधीन वाल्सन, म्हापशाचे एसडीपीओ जिवबा दळवी, कोलवाळ पोलिस ठाण्याचे पोलिस निरीक्षक सोमनाथ महाजिक यांच्या मार्गदर्शनाखाली कोलवाळ पोलिस स्थानकाच्या पथकाने हा तपास केला.

या पथकात पोलिस उपनिरीक्षक कुणाल नाईक, हेड कॉन्स्टेबल रूपेश कोरगावकर, सुधीर परब, पोलिस कॉन्स्टेबल सुलेश नाईक यांचा समावेश होता. गुन्हा घडल्यापासून हे पथक संशयिताच्या मागावर होते. पथकाने पूर्ण क्षमतेने सर्व प्रयत्न करत शोध घेतला.