डिचोली: गेल्या महिनाभरात डिचोली पोलिसांनी ‘ड्रग्ज’विरोधी केलेली कारवाई पाहता, अमलीपदार्थांची पाळेमुळे आता डिचोलीपर्यंत पोहोचली असल्याचे स्पष्ट होत आहे. एकाबाजूने राज्य ‘नशामुक्त’ करण्याचा सरकारचा संकल्प आहे, तर दुसऱ्याबाजूने काही भागात ‘ड्रग्ज’चा धोका दिवसेंदिवस चिंताजनक बनत असल्याचे दिसून येत आहे.
गेल्या बावीस दिवसांत डिचोली पोलिसांनी ‘ड्रग्ज’प्रकरणी केलेल्या कारवाईचा विचार करता, डिचोलीतील ग्रामीण भागात ‘ड्रग्ज’ पोहोचल्याचे स्पष्ट होत आहे. गेल्या महिन्यात डिचोली पोलिसांनी वाठादेव-सर्वण येथे केलेल्या एका कारवाईत दोन स्थानिक युवकांना गांजासह अटक केली होती.
त्यानंतर लाडफे येथे पोलिसांनी केलेल्या अमलीपदार्थ विरोधी कारवाईत एका नेपाळी युवकाला अटक केली होती. त्यानंतर गेल्या मंगळवारी मध्यरात्री शिरगाव येथे केलेल्या कारवाईत एका स्थानिक युवकाला गांजासह रंगेहाथ अटक केली.
यावरून डिचोली अमलीपदार्थांच्या विळख्यात अडकल्याचा धोका वाढला आहे. पोलिसही त्यादिशेने तपास करीत असल्याची माहिती मिळाली आहे.
अमलीपदार्थांची ‘नशा’ तरुणाईसह काही शाळांपर्यंतही पोहोचली आहे. ऑगस्ट २०२३ मध्ये तालुक्यातील एका विद्यालयात एका विद्यार्थ्याच्या बॅगेत ‘ई-सिगारेट्स’ सापडली होती. रात्रीच्यावेळी काही निर्जन भागात युवकांचे गट बसलेले दिसून येतात. या युवकांकडून अमलीपदार्थांचे सेवन करण्यात येते, असा संशय आहे. या भयानक प्रकारावर वेळीच नियंत्रण आणण्यात यश आले नाही, तर अमलीपदार्थांची ‘धुंदी’ पूर्ण तालुक्याला चढण्याची भीती वर्तविण्यात येत आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
