Jeet Arolkar : ‘अटल आसरा’तून गरिबांना आधार

Jeet Arolkar on Atal Asara: केंद्र आणि राज्य सरकारची प्रत्येक योजना ही गरिबांच्या हितासाठीच असते. त्यातील एक योजना म्हणजे अटल आसरा ही योजना चांगली असून, या योजनेतून गरिबांना आधार मिळेल, असे प्रतिपादन मांद्रेचे आमदार जीत आरोलकर यांनी केले.

मांद्रे मतदारसंघातील एकूण 44 गरजूंना घर दुरुस्तीसाठी अटल आसरा योजनेअंतर्गत दीड लाख रुपयांच्या अनुदान निधीचे मंजुरीपत्र वितरित केल्यानंतर ते बोलत होते.

आरोलकर म्हणाले, की या योजनेतून मंजूर झालेल्या निधीपैकी आठ दिवसांत लाभार्थ्यांच्या बँक खात्यात एकूण 75 हजार रुपये जमा होणार आहेत .

त्यातून लाभार्थी आपली घरे पावसाळ्यापूर्वी दुरुस्त करू शकतात. निम्मे काम झाल्यानंतर उरलेले 75 हजार जमा होतील. राज्य सरकार असो वा केंद्र सरकार गरिबांसाठी वेगवेगळ्या योजना राबवत आहे.

परंतु त्या योजना लोकांपर्यंत पोहोचवण्याचे काम अधिकाऱ्यांबरोबरच सरपंच, उपसरपंच, पंच सदस्य, जिल्हा पंचायत सदस्य, लोकप्रतिनिधी यांचेही आहे.

ज्या नागरिकांना वेगवेगळ्या योजनांचा लाभ घ्यायचा आहे, त्यांनी मांद्रे येथील आपल्या कार्यालयात किंवा तुये येथील डीजी सेवा केंद्रात संपर्क साधावा.