म्हापसा: अस्नोडा पंचायत क्षेत्रातील रस्त्यांलगतच्या बांधकामांना सरकारने बजावलेल्या नोटिसींविरोधात येत्या २४ सप्टेंबरला रिव्होल्युशनरी गोवन्स पक्षाच्या वतीने अस्नोडा बसस्थानकावर सायंकाळी ४.३० वाजता निषेधार्थ आंदोलन केले जाणार असल्याची माहिती आरजीपीचे प्रमुख मनोज परब यांनी दिली.
ग्रामीण भागांतील रस्त्यांलगतच्या बहुतांश पिढीजात घरे, आस्थापने, दुकाने, संरचनांना सध्या प्रशासनाकडून नोटिसा बजावल्या आहेत. त्यानुसार ही बांधकामे जमीनदोस्त करून तिथे रस्त्यांची रुंदी २५ ते ३० मीटरपर्यंत वाढविण्याचा डाव सरकारने आखला आहे.
थिवी मतदारसंघातील अस्नोडा पंचायत क्षेत्रात सरकारने अशाच पद्धतीने नोटिसा काढून येथील ग्रामस्थांची घरे व रोजगार हिसकावण्याचा प्रयत्न चालविला आहे. याचा विरोध करण्यासाठी रिव्होल्युशनरी गोवन्स पक्ष हे निषेधार्थ आंदोलन करण्यात येईल, असे परब यांनी सांगितले. गुरुवारी थिवी येथील पक्षाच्या कार्यालयात आयोजित पत्रकार परिषदेत ते बोलत होते.
परब पुढे म्हणाले की, रस्ता रुंदीकरणाच्या आडून सरकार गावात मोठे प्रकल्प आणू पाहते. अस्नोडा मार्केट ही जुनी बाजारपेठ आहे. मुळात, पर्यायी बायपास रस्त्याचे काम सुरू असताना, सरकारला आणखीन गावातून ३० मीटर रस्ता रुंद कशाला हवा, असा प्रश्‍न त्यांनी उपस्थित केला.
आरजीपीने अस्नोडामध्ये गुरुवारपासून स्वाक्षरी मोहिमेला सुरवात केली असून, २४ रोजी होणाऱ्या आंदोलनाविषयी जागृती करून लोकांना यात सहभागी होण्याचे आवाहन करणार आहे. सध्या सरकार फूट पाडा व राज्य करा या धोरणांचा अवलंब करून येथील लोकांना टप्याटप्याने नोटिसा काढत आहे. सरकारच्या या प्रणालीवर मनोज परब यांनी टीका केली. दरम्यान, २४ रोजी, होणाऱ्या आंदोलनात स्थानिकांसह दुकानदारांनी मोठ्या संख्येने सहभागी होण्याचे आवाहन परब यांनी केले.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
