Marvel Chess Tournament: गोव्याच्या 'चैतन्य'ची मार्व्हल आंतरराष्ट्रीय स्पर्धेत 'अव्वल' कामगिरी

पणजी: गोमंतकीय बुद्धिबळपटू चैतन्य गावकर याने हैदराबाद येथे झालेल्या आंतरराष्ट्रीय पातळीवरील बुद्धिबळ स्पर्धेतील १८०० एलो मानांकनांखालील गटात अव्वल कामगिरी बजाबली.

देश-विदेशातील खेळाडूंचा समावेश असलेल्या या स्पर्धेत १८०० एलो गटात चैतन्यला २५वे मानांकन होते. स्पर्धेत त्याने एक बरोबरी वगळता सर्व डाव जिंकले. स्पर्धेपूर्वी त्याचे १७१३ एलो गुण होते. हैदराबादमधील यशस्वी कामगिरीने त्याच्या खाती १४४ एलो गुण जमा होतील.

चैतन्य हा डिचोली येथील श्री शांतादुर्गा विद्यालयात नवव्या इयत्तेत शिकतो. त्याचे गोवा बुद्धिबळ संघटनेचे अध्यक्ष महेश कांदोळकर, सचिव आशेष केणी, डिचोली तालुका बुद्धिबळ संघटनेचे अध्यक्ष राजन कडकडे, सचिव सत्यवान हरमलकर, तसेच इतर पदाधिकाऱ्यांनी अभिनंदन केले आहे.