मडगाव: बेताळभाटी येथे ८५ वर्षीय वयोवृद्ध लॉयला डिसोझा यांना त्यांचा मुलगा इजिदोर डिसोझा आणि सून तेरेजा गोन्साल्विस यांनी अमानुष मारहाण केल्याची धक्कादायक घटना उघडकीस आली आहे. याप्रकरणी कोलवा पोलिसांनी दोघांविरुद्ध गुन्हा नोंद करून त्यांना ताब्यात घेतले असून पुढील चौकशी सुरू आहे.

ही घटना ८ जुलै रोजी सकाळी ९ ते दुपारी २ वाजण्याच्या दरम्यान घडली. घरात बसविण्यात आलेल्या सीसीटीव्ही कॅमेऱ्यात संपूर्ण प्रकार कैद झाला. हा व्हिडिओ समोर आल्यानंतर समाजमाध्यमांवर तो मोठ्या प्रमाणात व्हायरल झाला आणि नागरिकांनी संताप व्यक्त केला.

पीडित वृद्धाची लंडनमध्ये वास्तव्यास असलेली मुलगी मारिया डिसोझा हिने सीसीटीव्ही फुटेज पाहिल्यानंतर कोलवा पोलिसांकडे ई-मेलद्वारे तक्रार दाखल केली. तक्रारीनुसार, तिच्या भावाने आणि भावजयीने आसहाय्य वडिलांना हाताने तसेच चपलेने मारहाण केली. वृद्धत्वामुळे त्यांना स्वतःचा बचाव करता आला नाही. या घटनेमुळे त्यांना शारीरिक दुखापतींसह मानसिक धक्काही बसला असून ते भीतीच्या छायेखाली वावरत आहेत.

तक्रार आणि सीसीटीव्ही फुटेजच्या आधारे कोलवा पोलिसांनी तातडीने कारवाई करत इजिदोर डिसोझा व तेरेजा गोन्साल्विस यांच्याविरुद्ध गुन्हा दाखल केला. पोलिस निरीक्षक विदेश शिरोडकर यांनी दोघांना ताब्यात घेण्यात आले असून प्रकरणाचा अधिक तपास सुरू असल्याची माहिती दिली.