खोतोडा-सत्तरी ग्रामपंचायत क्षेत्रातील सुरुंगुली व शिरसोडे गावात बुधवारी (25 मार्च) रात्री 10.30 वाजण्याच्या दरम्यान दहा मिनिटांच्या आलेल्या चक्रीवादळामुळे तब्बल 15 घरांचे नुकसान झाले. यावेळी जोरदार वादळी वारा गडगडाटासह सुरु झाला तसेच काहीशा गाराही पडल्या. त्यामुळे सुरुंगुली गावातील श्री सातेरी ब्राह्मणी देवस्थानच्या सभामंडपाचे अर्धे छप्पर उडून गेले, तसेच गावातील घरांची कौले, पत्रे यांचे नुकसान होऊन लोकांना आर्थिक फटका बसला.

या घटनेमुळे बुधवार रात्रभर गावात वीजपुरवठाही खंडित झाला. या घटनेत सुरुंगुली गावातील प्रेमनाथ गावकर, राजेश गावकर, सुरेश गावकर, चंद्रकांत गावकर तर शिरसोडे गावातील संदीप गावकर, सुरज गावकर, मंगेश पर्येकर, आप्पा केरकर यांच्या घरांचे नुकसान झाले. चक्रीवादळात घरांची छपरे उडाली तर सुरेश गावकर, आपा केरकर यांच्या घरांवर झाड कोसळून नुकसान झाले. तसेच, केळी पिकांच्या बागायतीलादेखील मोठा फटका बसला. यावेळी गाराही कोसळल्या. दुसरीकडे, शिरसोडे गावात वीज सुरळीत झाला, पण सुरुंगुलीत अजूनही वीज खंडित होता. दरम्यान, सध्या तलाठ्यांमार्फत झालेल्या नुकसानीची पाहणी सुरु आहे.