म्हापसा: श्री स्वामी समर्थ यांच्याबद्दल सोशल मीडियावर धार्मिक भावना दुखावणारी आक्षेपार्ह पोस्ट केल्याप्रकरणी हणजूण पोलिसांनी अटक केलेल्या संशयिताला शनिवारी, म्हापसा येथील प्रथमवर्ग न्यायदंडाधिकारी न्यायालयाने जामीन मंजूर केला आहे.

संतोष रामचंद्र लमाणी (रा. बायणा, मूळ रा. बागलकोट, कर्नाटक) असे या संशयिताचे नाव आहे. धार्मिक भावना दुखावण्याच्या आणि जाणीवपूर्वक व खोडसाळपणे आक्षेपार्ह मजकूर सोशल मीडियावर प्रसारित केल्याच्या आरोपाखाली पोलिसांनी त्याच्यावर कारवाई करत त्याला अटक केली होती. या प्रकरणावर म्हापसा न्यायालयात सुनावणी झाली असता, न्यायालयाने २० हजार रुपयांच्या वैयक्तिक जातमुचलक्यावर संशयित संतोष लमाणी याला जामीन मंजूर केला.