Sudin Dhavalikar About Jeet Arolkar

फोंडा: मगोच्‍या कार्यकर्त्यांनी जीत आरोलकर यांना निवडून दिले असून ते मगोतच राहतील. ते कोठेही जाणार नाहीत. मगो पक्षात निवडून येऊन इतर पक्षांत गेलेल्यांची स्थिती सध्या काय आहे, हे सर्वांना माहीत आहे, असा टोला तथा इशारा मगोचे नेते तथा वीजमंत्री सुदिन ढवळीकर यांनी देऊन एका दगडात अनेक पक्षी मारण्‍याचा प्रयत्‍न केला.

भाजपचे नवे प्रदेशाध्यक्ष दामोदर ऊर्फ दामू नाईक यांचे आपण अभिनंदन करतो. आपल्‍या पक्षाशी एकनिष्ठ राहिल्‍यामुळेच त्‍यांना हे पद मिळाले. त्‍यामुळे दामू नाईक यांनी पक्ष सोडून गेलेल्यांना महत्त्व देण्याऐवजी पक्षाशी एकनिष्ठ राहणाऱ्या कार्यकर्त्यांची दखल घेऊन पक्षकार्य वाढवावे, असा सल्ला ढवळीकर यांनी दिला. ऐनवेळी ‘ऑफर’ देऊन पक्षाशी निष्ठा असणाऱ्यांचे मनोबल खच्चीकरण केले जाते, असा आरोपही त्‍यांनी केला.

सुदिन ढवळीकर, (मगो)

आपण गेली ५० वर्षे मगो पक्षाशी एकनिष्ठ राहिलो. अनेक ऑफर्स आल्या, पण बधलो नाही. मगो पक्षातून मोठे झालेल्या अनेकांनी हा पक्ष सोडून इतर पक्षांची कास धरली. पण त्‍यांची स्‍थिती आता काय आहे? म्‍हणूनच दामू नाईक यांना शुभेच्छा देतो आणि त्यांच्या राजकीय निष्ठेबद्दल अभिनंदन करतो.