Margao sewage pipeline

मडगाव: येथील सांडपाणी वाहिनीचे चार पंप बंद पडल्‍यामुळे कित्‍येक ठिकाणी सांडपाणी रस्त्यावरून वाहू लागले आहे. या पार्श्वभूमीवर सोमवारी आमदार दिगंबर कामत यांनी अधिकाऱ्यांबरोबर बैठक घेतली.

यावेळी मडगावात केवळ ७५ टक्‍के सांडपाणी वाहिनीचे काम पूर्ण झाल्याचे समोर आले. हे काम पूर्ण करण्‍यासाठी आता युद्ध पातळीवर प्रयत्‍न करण्‍याची गरज व्यक्त आली.

काही दिवसांपूर्वी कोंब येथे या वाहिनीतील सांडपाणी रस्‍त्‍यावरून वाहू लागल्‍यामुळे अडचण निर्माण झाली होती. प्रसार माध्‍यमांवरुनही हा प्रश्‍न गाजला होता. त्‍यामुळे ही बैठक घेण्‍यात आली. सांडपाणी शुद्धीकरण प्रकल्‍पाचे चार पंप बंद पडल्‍यामुळे ही स्‍थिती उद्‍भवली आहे.

हे पंप दुरुस्‍त करण्‍यासाठी आदेश दिले आहेत. मात्र तोपर्यंत ज्‍या ठिकाणी सांडपाणी रस्त्यावरून वाहते त्‍या ठिकाणी नाईट सॉईल टँकर तैनात केले असून त्‍याद्वारे रस्‍त्‍यावर पसरणारी ही घाण साफ केली जाईल, असे कामत यांनी सांगितले.

मडगावच्‍या न्‍यू मार्केट परिसरात कित्‍येक वेळा आग लागण्‍याच्‍या घटना घडल्‍या आहेत. अशी कुठलीही दुर्घटना घडल्‍यास तात्‍पुरती मदत मिळावी यासाठी या मार्केटात पाण्‍याचे चार हायड्रंन्‍टस्‌ बसविण्‍यात येणार असून यासाठी ७७ लाख रुपये खर्च करण्‍यात येतील, असे कामत यांनी सांगितले.

या बैठकीला दक्षिण गोव्‍याचे जिल्‍हाधिकारी ॲग्‍ना क्‍लिटस तसेच अतिरिक्‍त जिल्‍हाधिकारी श्रीनेत कोठवाळे हे उपस्‍थित होते.