वाळपई: गोमंतकाच्या सांस्कृतिक व पारंपरिक इतिहासात महत्त्वाचे स्थान असलेल्या सत्तरी तालुक्यातील ठाणे गावातील सात भावांची श्री देव मंडळगिरो-कोळगिरो स्थळावर साजरा होणारा त्रैवार्षिक घोडेमोडणी उत्सव शनिवारी मोठ्या उत्साहात झाला.

उत्सवाच्या दिवशी संपूर्ण परिसर भाविक व नागरिकांच्या उपस्थितीने फुलून गेला होता. सात गावांतील घोड्यांची हातभेट झाल्यानंतर ठाणे पंचायत क्षेत्रातील पंचायत इमारतीसमोरील मंडळगिरो-कोळगिरो मैदानावर हजारो भाविकांच्या साक्षीने चौदा घोड्यांचा पारंपरिक नृत्यप्रकार सादर करण्यात आला. या नृत्याविष्काराने उपस्थितांना मंत्रमुग्ध केले.या सोहळ्यात पर्येच्या आमदार डॉ. दिव्या राणे यांनी उपस्थित राहून घोड्यांची पूजा केली.

मंडळगिरो व कोळगिरो हे देवस्थान नवसाला पावणारे म्हणून प्रसिद्ध आहे. त्यामुळे भाविक मोठ्या श्रद्धेने येथे येऊन नवस व्यक्त करतात व तो याच दिवशी फेडतात. त्यामुळे देवदर्शनासाठी भाविकांच्या मोठ्या रांगा लागल्या होत्या. पहाटे घोड्यांचा नृत्याविष्कार सादर झाला.