फोंडा: हळदय वाजे-शिरोडा येथील समीक्षा नाईक या ६० वर्षीय महिलेच्या मोडकळीस आलेल्या घराची दुरुस्ती करून देण्यासाठी समाजकार्यकर्ते शिवप्रसाद शिरोडकर तसेच ‘मगो’चे संकेत मुळे यांनी मदतीचा हात पुढे केला आहे.

माकडाने छपरावर उडी घेतल्याने तसेच एका झाडाची फांदी कोसळल्याने छप्पर कोसळण्याच्या मार्गावर असल्याचे वृत्त ‘गोमन्तक टीव्ही’ वाहिनीतून प्रसारित झाले होते. त्याची दखल घेऊन शिवप्रसाद शिरोडकर यांनी घराची दुरुस्ती करून देण्याचे आश्वासन समीक्षा नाईक यांना सोमवारी (ता.१६) सकाळी भेट घेऊन दिले आहे.

अनेकजण मदतीसाठी आले पुढे

शिरोडा मतदारसंघात मगो पक्षाचे कार्य पाहणारे संकेत मुळे यांनी सोमवारी सकाळी समीक्षा नाईक यांच्या घरी १० पत्रे पाठवून दिले आहेत. त्याशिवाय अन्य काहीजणांनी लवकरच वृद्ध महिलेला मदत करण्यासाठी होकार दिला आहे. तसेच समाजकार्यकर्ते शिवप्रसाद शिरोडकर यांनी समीक्षा नाईक यांच्या घराची दुरुस्ती करण्याच्या कामाला मंगळवारपासून सुरुवात केली जाणार आहे, असे सांगितले.