पेडणे: साहित्यिक, विचारवंतांनी गोवा घडविला आहे. परंतु आज तो गोवा बिघडत चालला आहे. गोमंतकीयांनी भाषिक वादात न अडकता कोकणीबरोबर रोमी कोकणी आणि मराठीला राजभाषा करायला हवी. त्यामुळे कोणाचेच नुकसान होणार नाही, उलट भाषिक सलोखा टिकून राहील, असे प्रतिपादन ‘गोमन्तक’चे संपादक-संचालक राजू नायक यांनी केले.

‘मिशन फॉर लोकल’ आणि ‘त्रिसुपर्ण’ पेडणे यांच्या संयुक्त विद्यमाने पेडणे येथील बागायतदार सभागृहात आयोजित पेडणे तालुका साहित्यिक स्‍नेहमेळाव्याचे उद्‌घाटन केल्‍यानंतर नायक बोलत होते.

यावेळी गोवा मराठी अकादमीचे अध्यक्ष प्रा. अनिल सामंत, ज्‍येष्ठ पत्रकार गुरुदास सावळ, साहित्य सेवक मंडळाचे अध्यक्ष रमेश वंसकर, पत्रकार किशोर नाईक गावकर, ‘मिशन फॉर लोकल’चे अध्यक्ष राजन कोरगावकर, ‘त्रिसुपर्ण’चे निमंत्रक राजमोहन शेट्ये, चंद्रकांत सांगळे आदी मान्यवर उपस्थित होते.

गणेशवंदनेने कार्यक्रमाला प्रारंभ झाला. चंद्रकांत सांगळे यांनी प्रास्ताविक केले तर राजन कोरगावकर यांनी स्नेहमेळाव्याचे प्रयोजन स्पष्ट केले. त्‍यांच्‍यासह राजमोहन शेट्ये, गुंडू राऊळ, चंद्रकांत सांगळे, उमेश गाड यांनी मान्यवरांना पुष्पगुच्छ प्रदान केले. डॉ. भक्ती महाजन, प्रिया टांगसाळी, सोनाली परब सावळ देसाई, साहिल नारुलकर यांनी सूत्रसंचालन केले. राजमोहन शेट्ये यांनी आभार मानले.