फोंडा परिसरात चोरट्यांनी एकाच रात्रीत धुमाकूळ घालत तीन ठिकाणी धाडसी चोऱ्या केल्या आहेत. उसगाव येथील भवानी सिद्धपुरुष मंदिरातील खिडकीचे ग्रिल्स कापून चोरट्यांनी देवीचे पुरातन सोन्याचे दागिने आणि दानपेटीतील रोकड लांबवली. सीसीटीव्हीमध्ये हेल्मेट घातलेला एक संशयित कैद झाला आहे. दुसऱ्या घटनेत, ढवळी येथील सत्यनारायण मंदिराची दानपेटी फोडून १० हजार रुपये पळवले. तर तिसऱ्या घटनेत, बोरी येथील माजी सरपंच लुईस कॉस्ता यांचा बंगला फोडून मोठा ऐवज लंपास केला. चोरीवेळी बंगल्यात कोणीही नव्हते. एकाच रात्री झालेल्या या तीन मोठ्या चोऱ्यांमुळे पोलिसांसमोर तपासाचे मोठे आव्हान उभे ठाकले आहे.