डिचोली: मंगलमूर्तीच्या जयघोषात डिचोलीतील विविध भागात गुरुवारी एका दिवसाची ''चवथ'' (चतुर्थी) भक्तिभावाने मोठ्या उत्साहात साजरी करण्यात आली. काही अपरिहार्य कारणामुळे काही कुटुंबीयांना गेल्या महिन्यात चतुर्थीवेळी गणपती पूजन करायला मिळाले नव्हते. त्यामुळे या गणेशभक्तांनी विनायक चतुर्दशीला गणपती पूजन करून एक दिवसाची ''चवथ'' साजरी केली.

मये, बोर्डे, म्हावळींगे आणि अन्य वेगवेगळ्या भागात मिळून जवळपास दीडशे घरांनी गणपती पूजन करण्यात आले होते. सकाळी घरोघरी गणपतीचे आगमन झाल्यानंतर मूर्तीची विधिवत स्थापना आणि पूजन करण्यात आले. फळांफुलांनी माटोळी तसेच आकर्षक सजावटही करण्यात आली होती. गणपतीच्या मूर्तींचे पूजन केलेल्या घरोघरी भजन, आरत्या झाल्या. सायंकाळी उत्तरपूजा झाल्यानंतर गणपतीच्या मूर्ती विसर्जनासाठी बाहेर काढण्यात आल्या.