उत्तर गोवा जिल्हा रुग्णालयातील कारभारावर प्रश्नचिन्ह निर्माण करणारी एक गंभीर बाब समोर आली आहे. रुग्णांच्या सोयीसाठी आणि हॉस्पिटल प्रशासनापर्यंत त्यांच्या समस्या पोहोचवण्यासाठी बसवलेली 'तक्रार पेटी' (Grievance Box) चक्क कचरापेटी (Dustbin) म्हणून वापरली जात असल्याचे उघड झाले आहे. रुग्णालय हे नागरिकांच्या आरोग्याच्या आणि सेवेच्या दृष्टीने अत्यंत महत्त्वाचे ठिकाण आहे. येथील सेवांमध्ये काही त्रुटी असल्यास किंवा रुग्णांना काही अडचणी येत असल्यास, त्या थेट वरिष्ठ प्रशासनापर्यंत पोहोचवण्यासाठी तक्रार पेटी बसवलेली असते. मात्र, उत्तर गोवा जिल्हा रुग्णालयात या तक्रार पेटीची अवस्था अत्यंत दयनीय झाली आहे.