Yuri Alemao On Mhadei River Dispute

पणजी: म्हादई नदीचा प्रश्‍‍न आता राज्य सरकारसाठी प्राधान्याचा राहिलेला नाही. वारंवार मागणी करूनही मुख्यमंत्री डॉ. प्रमोद सावंत हे दिल्लीत सर्वपक्षीय शिष्टमंडळ नेऊ शकत नाहीत, अशी टीका विरोधी पक्षनेते युरी आलेमाव यांनी आज पर्वरी येथे केली. पत्रकारांशी बोलताना ते म्हणाले, विधानसभेच्या पहिल्या अधिवेशनापासून हा विषय चर्चेत आला आहे. कर्नाटक सरकार गोव्‍याचे पाणी पळवण्यासाठी सर्वतोपरी प्रयत्न करत आहे. केंद्रातील भाजप सरकारकडे हा विषय मांडण्यासाठी राज्यातील भाजपचेच सरकार वेळ मिळवू शकत नाही. यावरून सरकारला या प्रकरणी किती गांभीर्य आहे हे दिसून येते, असा टोलाही त्‍यांनी हाणला.

या विषयावर आवाज उठवण्यासाठी आम्ही सरकारसोबत आहोत. दिल्लीत सरकारने शिष्टमंडळ नेल्यास त्यात आम्ही सहभागी होऊ असे सांगून युरी म्हणाले, कळसा-भांडुरा प्रकल्पाच्या अहवालास केंद्र सरकारने दिलेली मान्यता मागे घ्यायला लावली पाहिजे.