डिचोली: मये-वायंगिणी ग्रामपंचायतीच्या सरपंचपदावरून निर्माण झालेला गुंता अखेर आज सुटला. सरपंचपदाची माळ वासुदेव गावकर तर उपसरपंचपदाची माळ सीमा आरोंदेकर यांच्या गळ्यात पडली. दोघांचीही बिनविरोध निवड झाली. दरम्यान, मयेचे आमदार प्रेमेंद्र शेट यांनी नवनिर्वाचित सरपंच आणि उपसरपंचांचे अभिनंदन करून मयेच्या विकासासाठी कार्यरत रहा, असे आवाहन केले. सरपंच आणि उपसरपंचपदासाठी अनुक्रमे वासुदेव गावकर आणि सीमा आरोंदेकर यांनी अर्ज भरला होता. निर्वाचन अधिकारी प्रतापराव राणे यांनी हे अर्ज ग्राह्य धरून त्‍यांची बिनविरोध निवड जाहीर केली.