नवीन केटीसी बसस्थानकावर आज अन्न आणि औषध प्रशासनाकडून (एफडीए) 200 किलो भेसळयुक्त बडीशेप जप्त करण्यात आली. सध्या एफडीएकडून धडक कारवाई राज्यभर सुरू आहे. हा भेसळयुक्त मुद्देमाल पुण्याहून आंतरराज्य बसमधून आणण्यात आला होता. या बडीशेपचा पुरवठा स्थानिक मसाल्यांच्या दुकानात केला जाणार होता. याचे नमुने एफडीएने घेतले आहेत. एक किलोची एकूण 200 पाकिटे जप्त केली असून हा मुद्देमाल 74 हजार रुपये इतका आहे. या बडीशेपला प्रक्रिया केलेला रंग चढविण्यात आला होता. याप्रकरणी गुन्हा दाखल केला जाणार असल्याचे एफडीएच्या अधिकाऱ्यांनी सांगितले.