म्हापशात ४ वर्षांच्या चिमुरडीवर झालेल्या लैंगिक अत्याचार प्रकरणी कठोर कारवाई करण्याचे आदेश गृहमंत्री या नात्याने मुख्यमंत्री डॉ. प्रमोद सावंत यांनी पोलिसांना दिले आहेत. अशा विकृत प्रवृत्तीच्या व्यक्तीला कायमचे गजाआड पाठवले पाहिजे, असे संतप्त उद्‌गारही त्‍यांनी काढले.

संपूर्ण राज्‍य दिवाळीच्या आनंदात मग्न असताना माणुसकीला काळीमा फासणारी ही घटना रविवारी रात्री घडली. म्‍हापशातील डॉ. राम मनोहर लोहिया उद्यानासमोरील एका निर्जन व पडक्या इमारतीत चिमुरडीवर लैंगिक अत्याचार झाल्याने परिसरात खळबळ उडाली आहे.

‘‘या घृणास्पद कृत्याचा मी निषेध करतो. अशा मनोवृत्तीच्या व्यक्तींना समाजात स्थान असता कामा नये. पोलिस या प्रकरणी कठोरातील कठोर कारवाई करतील आणि संशयिताला कायमचे गजाआड पाठवतील’’ असे मुख्यमंत्री म्हणाले.