मुंबई: जूनमधील पर्जन्याची तूट आणि अन्य घटकांमुळे मदत व पुनर्वसन विभागाने खरीप हंगामामध्ये ‘ट्रीगर-१’ लागू झालेल्या महाराष्ट्रातील २६५ तालुक्यांत दुष्काळसदृश परिस्थिती जाहीर केली आहे. यामध्ये छत्रपती संभाजीनगर विभागातील सर्वाधिक ७४ तालुक्यांत दुष्काळसदृश परिस्थिती आहेत.

खरीप हंगामामध्ये पावसाची तूट आणि अन्य निकषांमुळे ‘ट्रिगर-१’ लागू झालेल्या २६५ तालुक्यांसाठी हा निर्णय लागू असणार आहे. या तालुक्यांमध्ये तातडीने पंचनामे सुरू करून पीक परिस्थितीचे छायाचित्र व जीपीएस माहिती संकलित करण्याचे निर्देश जिल्हाधिकाऱ्यांना देण्यात आले आहेत. दुष्काळग्रस्त तालुक्यांसाठी सरकारने विविध सवलती आणि उपाययोजना लागू केल्या आहेत.

पीक परिस्थितीचा अहवाल देणार

कृषी आयुक्तांनी खरीप हंगामाचा आढावा घेऊन राज्यातील २६५ तालुक्यांमध्ये दुष्काळी परिस्थिती असल्याचा अहवाल सादर केला. त्यामुळे आता या तालुक्यामध्ये जून ते आजपर्यंतच्या कालावधीतील पर्जन्याची तूट व अन्य घटकांचा फटका बसलेल्या २६५ तालुक्यांमध्ये दुष्काळी परिस्थितीबाबत दुष्काळाबाबतच्या ट्रिगर-१ (प्रथम कळ) अनुषंगाने पंचनामे करण्यात येणार आहेत. सर्वेक्षण केलेल्या क्षेत्रातील पिकांची स्थिती दर्शवणारे छायाचित्र व जीपीएस कोऑर्डीनेट संकलन करून पिक परिस्थितीचा अहवाल तयार करण्यात येणार आहे.

दुष्काळी परिस्थितीत राज्यातील शेतकरी, शेतमजूर, कष्टकरी आमच्या मदतीच्या केंद्रस्थानी असून, त्यांना दिलासा देण्यासाठी सर्वतोपरी प्रयत्न केले जाणार आहेत. आम्ही शेतकरी बांधवांच्या पाठीशी खंबीरपणे उभे आहोत. या आव्हानावर मात करण्यासाठी आपण सर्व एकजुटीने प्रयत्न करूया. - देवेंद्र फडणवीस, मुख्यमंत्री