मडगाव: मडगाव रेल्वे स्टेशनवर गुरुवार (दि.२३) रोजी सकाळ अत्यंत दुर्दैवी आणि अपघाताने भरलेली ठरली. एका प्रवाशाला धावत्या ट्रेनमध्ये चढण्याचा प्रयत्न करणे जीवावर बेतले. मिळालेल्या माहितीनुसार, सकाळी एका व्यक्तीने रेल्वे स्टेशनवर ट्रेन सुरू झाल्यावर तिच्यामध्ये चढण्याचा प्रयत्न केला. त्याने ट्रेनच्या बाजूचा हँडल बार पकडण्याचा प्रयत्न केला, पण दुर्दैवाने त्याचा हात निसटला आणि तोल जाऊन तो खाली पडला. या भीषण अपघातात त्याचे दोन्ही पाय ट्रेनच्या चाकाखाली आल्याने त्याला गंभीर दुखापत झाली. स्टेशनवरील उपस्थित प्रवाशांनी आणि रेल्वे कर्मचाऱ्यांनी तातडीने त्याला नजीकच्या हॉस्पिटलमध्ये हलवले. मात्र, हॉस्पिटलमध्ये नेत असतानाच रस्त्यात त्याचा मृत्यू झाला.