सावर्डे येथील डुक्करकोंड, काले गावातील लक्ष्मीनारायण कूर्से दांपत्यांची कन्या काव्यश्री कूर्से हिने वयाच्या एकविसाव्या वर्षी कमर्शियल पायलट परवाना (CPL) मिळवून एक महत्त्वपूर्ण ध्येय गाठले आहे. गोव्यात प्राथमिक ते उच्च माध्यमिक शिक्षण पूर्ण केल्यानंतर, काव्यश्रीने महाराष्ट्रातील बारामती विमान प्रशिक्षण केंद्रात २०० तासांचे उड्डाण प्रशिक्षण यशस्वीरित्या पूर्ण केले.

लहानपणापासूनच विमानवाहन क्षेत्राची प्रचंड आवड असलेल्या काव्यश्रीने कठोर परिश्रमातून हे यश संपादन केले असून, तिची ही कामगिरी केवळ तिच्या कुटुंबासाठीच नव्हे, तर डुक्करकोंड गावासाठीही अत्यंत अभिमानाची बाब ठरली आहे. भविष्यात त्या एक यशस्वी महिला पायलट म्हणून अधिक प्रगती साधतील, अशा शुभेच्छा त्यांना मिळत आहेत.