पणजी: कला अकादमीच्या विषयावर ‘कला राखण मांड''च्या सदस्यांनी सोमवारी सकाळी मंत्रालयात कला व संस्कृती मंत्री रमेश तवडकर यांच्याशी चर्चा केली. या बैठकीत मुख्यमंत्र्यांबरोबर याविषयी बैठक घेऊ, असे आश्वासन दिल्याची माहिती देविदास आमोणकर यांनी दिली. आमोणकर यांच्या नेतृत्वाखालील शिष्टमंडळाने तवडकर यांची भेट घेतली. यात विशाल पै काकोडे, दिलीप प्रभुदेसाई, साईश पाणंदीकर यांची उपस्थिती होती.

आमोणकर म्हणाले, यापूर्वीचे कला व संस्कृती मंत्री होते, त्याच्याबरोबर आमची कधीच बैठक झाली नाही. आमचे काही म्हणणे आहे, ते ऐकून घेत नव्हते. त्यामुळे जो गोंधळ निर्माण झाला, तो तवडकरांच्या कारकिर्दीत होऊ नये, यासाठी आम्ही तवडकर यांची भेट घेतली आणि आमची बाजू स्पष्ट केली. कला अकादमी पूर्वी होत्या त्या स्थितीत दुरुस्त करून मिळावी म्हणून आम्ही आंदोलन उभारले, त्याविषयी माहिती त्यांना दिली. आम्ही जे आंदोलन झाले, त्याविषयी तवडकरांना माहिती नव्हती त्यामुळे आम्हाला ती द्यावी लागली. रवींद्र भवनांचे सध्या जे प्रश्न निर्माण झाले आहेत, ते सोडविण्याची मागणी केली. तसेच नव्याने बांधण्यात येणाऱ्या रवींद्र भवनात अशी समस्या निर्माण होऊ नयेत, असेही त्यांना सूचित केले.

ते म्हणाले, तवडकर यांनी आमचे म्हणणे ऐकून घेतले असून, हे विषय सोडविण्यासाठी लवकरच मुख्यमंत्र्यांबरोबर बैठक घेऊ. त्याशिवाय कलाकारांचीही बैठक घेण्याचे त्यांनी मान्य केले. तवडकर यांच्यामध्ये संवेदनशीलता आहे, त्यांनी सर्व विषय समजून घेतले असून, ते नक्कीच सोडवतील अशी अपेक्षा आहे असेही त्यांनी सांगितले.