Calangute Hotel Demolition

कळंगुट: उमतावाडा-कळंगुट येथे सीआरझेड नियमांचे उल्लंघन करून बेकायदा उभारण्यात आलेल्या हॉटेल जर्मनीचा दर्शनी भाग शुक्रवारी संबंधित अधिकाऱ्यांच्या उपस्थितीत पाडण्यात आला. यावेळी चोख पोलिस बंदोबस्त ठेवण्यात आला होता.

दिल्लीस्थित कुलविंदर सिंग तसेच भूपिंदर सिंग यांच्या मालकीचे असलेल्या या हॉटेलचा दर्शनी भाग सागरी नियंत्रण रेषेत (सिआरझेड) येत असल्याने संबंधित मालकांना प्राधिकरणाकडून या आधी रीतसर नोटीस पाठविण्यात आली होती व बेकायदा भाग तोडण्याचे आदेश देण्यात आले होते. दरम्यान, या गोष्टींकडे हॉटेल मालकांनी काणाडोळा केल्याने सरतेशेवटी सिआरझेड प्राधिकरण तसेच स्थानिक पंचायतीच्या मदतीने हॉटेल जर्मनीचा दर्शनी भाग बुलडोझरच्या साहाय्याने पाडण्यात आला.

दरम्यान, अन्य एका प्रकरणात खोब्रावाडा-कळंगुट येथील इनासियो फर्नांडिस यांच्या मालकीच्या बेकायदा बांधकामावर सिआरझेड प्राधिकरणाकडून कारवाई करत ते पाडण्यात आल्याची माहिती कळंगुट पंचायत सूत्रांकडून मिळाली.