म्हापसा: राज्यात गेल्या काही दिवसांपासून अवकाळी पावसाची संततधार सुरू असून आज मंगळवारी (२० मे) सकाळपासूनच जोरदार सरी बरसल्या. यामुळे म्हापसा शहरातील विविध भागांमध्ये पाणी साचण्याचे दृश्य पाहायला मिळाले. विशेषतः म्हापसा मुख्य बाजारपेठ परिसर जलमय झाल्यामुळे व्यापाऱ्यांसह ग्राहकांची चांगलीच तारांबळ उडाली.

आज सकाळपासूनच ढगाळ हवामान होते आणि काही वेळातच मुसळधार पाऊस सुरू झाला. पावसाची तीव्रता इतकी होती की बाजारपेठेतील रस्ते आणि नाल्यांमध्ये पाणी भरून वाहू लागले. पावसामुळे वाहतुकीला अडथळा निर्माण झाला असून अनेक दुचाकी आणि चारचाकी वाहन चालकांना अडचणींचा सामना करावा लागला. दुकानदारांना आपली दुकाने वाचवण्यासाठी कंबर कसून काम करावं लागलं.