म्हापसा: पर्रा येथील एका ४५ वर्षीय महिलेचे २ लाख रुपये किमतीचे सोन्याचे मंगळसूत्र दिवसाढवळ्या लुटण्याचा प्रकार घडला आहे. तोंडाला रुमाल बांधून मोटरसायकलवरून आलेल्या दोघा चोरट्यांनी मंगळसूत्र हिसकावून नेण्याचा प्रकार केला. त्यानंतर ते पर्रा पेट्रोल पंपच्या दिशेने पळून गेले. घटना गुरुवारी दुपारी घडली. त्यानंतर या प्रकरणाची तक्रार शुक्रवारी म्हापसा पोलिस स्थानकात दाखल करण्यात आली. म्हापसा पोलिसांनी गुन्हा दाखल करून तपास सुरू केला आहे. मात्र, या प्रकरणात अध्यापही धागेदोरे सापडले नाहीत. मागील दोन महिन्यांत पर्रा परिसरात घडलेला हा दुसरा प्रकार आहे. पोलिसांनी सीसीटीव्ही फुटेज तपासणी सुरू केली असून पर्रात घडलेल्या दोन्ही प्रकारांत बरेचसे साम्य असल्याचेही पोलिसांना आढळून आले आहे.