साखळी: वरचे हरवळे-साखळी येथे भाड्याच्या खोलीत राहणाऱ्या एका कुटुंबातील अडीच वर्षांच्या मुलीचा घराबाहेर बांधलेल्या झोपाळ्यावर खेळताना गळफास लागून मृत्यू झाल्याची दुर्दैवी घटना शनिवार, ३ मे रोजी संध्याकाळी घडली.

डिचोली पोलिसांनी दिलेल्या माहितीनुसार, मृत मुलीचे नाव आराध्या ज्ञानेश्वर इंगळे असे असून हे कुटुंबीय मूळचे कर्नाटक येथील आहे. सध्या ते वरचे हरवळे-साखळी येथे भाड्याच्या घरात राहतात.

घराबाहेर बांधलेल्या कपड्याच्या झुल्यावर आराध्या ही तिचा मोठा भाऊ आणि इतर लहान मुलांसोबत खेळत होती. त्यावेळी तिच्या मानेला या झोपाळ्याच्या दोरीचा फास बसला. त्यात ती बेशुद्ध पडल्याने तिला लागलीच साखळी सरकारी आरोग्य केंद्रात नेण्यात आले. मात्र, तेथे उपचारादरम्यान तिचा मृत्यू झाला. याप्रकरणी डिचोलीचे पोलिस उपनिरीक्षक विकेश हडफडकर यांनी पंचनामा केला. वरिष्ठ अधिकाऱ्यांच्या मार्गदर्शनाखाली पोलिस या प्रकरणाचा पुढील तपास करीत आहेत.