GMC doctor suspension: गोवा वैद्यकीय महाविद्यालयाच्या आवारात झालेल्या आंदोलनात तीन मागण्या समोर ठेवण्यात आल्या आहेत आणि सर्व डॉक्टरांच्या वतीने डॉ. रुद्रेश कुट्टीकर यांनी कॉलेजचे डीन डॉ. शिवानंद बांदेकर यांना निवेदन सादर केले. या मागण्या सादर केल्यानंतर कॉलेजचे डीन डॉ. शिवानंद बांदेकर यांनी माध्यमांशी संवाद साधून संदर्भातील माहिती सादर केली. त्यांनी दिलेल्या माहितीनुसार डॉ. रुद्रेश यांच्या निलंबनाचे आदेश अद्याप जारी केलेले नाहीत, तसेच आरोग्यमंत्री मंत्री विश्वजित राणे यांच्या जाहीर माफीबद्दल मंत्रालयाच्या कार्यालयात संदेश पाठवण्यात आला असून प्रतिसादाची वाट पहिली जातेय.

आंदोलकांची मागणी पूर्ण करत यापुढे गोवा वैद्यकीय महाविद्यालयात व्हिडिओग्राफी करण्यास आता बंदी घालण्यात आली असून पोलिस देखील तैनात केले जातील आणि कडक एसओपी तयार करण्यासाठी ४ विभागीय अधिकारी नेमण्यात येणार आहेत. सर्वात महत्वाचं म्हणजे निलंबनाच्या घटनेचा व्हिडिओ रेकॉर्ड करणाऱ्या व्यक्तीविरुद्ध एफआयआर दाखल करणार असल्याची माहिती डीन डॉ. शिवानंद बांदेकर यांनी दिली आहे.