यंदाच्या गणेश चतुर्थीचा उत्साह सर्वत्र दिसून येत आहे. या उत्साहात सामील होण्यासाठी पोलीस अधीक्षक सुनिता सावंत यांनी गोमंतक कार्यालयाला भेट दिली. यावेळी त्यांनी गणपती बाप्पाची आरती करुन सर्वांना गणेश चतुर्थीच्या शुभेच्छा दिल्या.

गणेश चतुर्थीच्या निमित्ताने गोमंतक कार्यालयात गणपतीची स्थापना करण्यात आली आहे. पोलीस अधीक्षक सुनिता सावंत यांनी आज (27 ऑगस्ट) सकाळी कार्यालयाला भेट दिली. त्यांनी संपूर्ण टीमसोबत भक्तिमय वातावरणात गणपतीची आरती केली.

यावेळी, कार्यालयातील सर्व कर्मचाऱ्यांनी त्यांचे स्वागत केले. पोलीस दलातील उच्च पदस्थ अधिकारी स्वतः येऊन अशा धार्मिक कार्यक्रमात सहभागी झाल्याने एक सकारात्मक वातावरण निर्माण झाले. सुनिता सावंत यांनी गणपती बाप्पाकडे सर्वांच्या सुख-समृद्धीसाठी प्रार्थना केली.

या भेटीमुळे पोलीस प्रशासन आणि गोमंतक परिवार यांच्यातील चांगले संबंध दिसून आले. त्यांनी गणेशोत्सवाच्या शुभेच्छा देत लवकरच पुन्हा भेट देण्याचे आश्वासन दिले.